Yr hyn y gallwch ei ddisgwyl gan eich gweithiwr deintyddol proffesiynol 

Rydym wedi ymrwymo i'ch helpu i ddeall beth i'w ddisgwyl gan eich gweithiwr deintyddol proffesiynol, beth i'w wneud os nad ydyn nhw'n bodloni eich disgwyliadau a pha gamau rydym yn eu cymryd i'ch amddiffyn.

Rydym yn cyhoeddi dogfennau canllaw i bob gweithiwr deintyddol proffesiynol, gan amlinellu'r safonau y mae'n rhaid cadw atynt. Gallwch ddarllen y dogfennau hyn ar ein tudalen Safonau’r Tîm Deintyddol.

Eich hawliau

Cyn cytuno i unrhyw driniaeth feddygol, dylech ofyn y cwestiynau hyn i chi'ch hun.

Ydych chi’n gwybod a fydd y driniaeth yn cael ei darparu o dan y GIG neu'n breifat?

Ydych chi'n gwybod y gost debygol? Dylai unrhyw gynllun triniaeth a gewch nodi'n glir yr hyn y dylech ddisgwyl ei dalu. Os nad oes gan y feddygfa restr brisiau, gallwch ofyn am gael gweld un.

Ydych chi'n deall beth fydd yn digwydd fel rhan o'r driniaeth? Gofynnwch am gynllun triniaeth ysgrifenedig, os yw'n ddefnyddiol i chi.

Ydy'ch deintydd wedi dweud wrthych a oes unrhyw opsiynau triniaeth eraill?

Ydych chi'n teimlo'n hyderus bod yr holl wybodaeth angenrheidiol gennych er mwyn gwneud penderfyniad gwybodus?